是否我太死蠢

http://manincentral.blogspot.hk/2013/06/blog-post.html

我喜歡呢篇文章。原因除咗係內容之外，還因為作者，係一個響一九八九年時仲未出世既年輕人。

文章裡面提到那個「政府冇經驗，學生太天真」既講法。近年，類似既講法響網上睇過好多次。但比較震撼既一次，係一個朋友既兒子同我講既。對此，佢理直氣壯地拋出「因為政府冇防暴經驗，又冇橡膠子彈、胡椒噴霧…所以逼於無奈只能夠用真槍實彈。政府只係出於無奈，錯在班學生逼人太甚。」

朋友既兒子，講呢番話既時候，讀緊中二。佢話，呢啲都係學校嘅老師講的，所以應該唔會錯。我係個銅臭既商人，對政治其實一向係非常冷感的。早前我忽然關心起有關國民教育既議題，朋友兒子當日既說話，係其中一個「導火線」。

我問朋友既兒子：「你咁大個仔，有冇試過激嬲爸爸，搞到爸爸要體罰你？」

朋友既兒子說：「好似都有試過，咁大個人試過兩、三次啦。」

「你爸爸用乜嘢打你呀？」我問。

「雞毛掃囉！」朋友的兒子說。

「咁如果你激嬲咗爸爸，爸爸要體罰你…」我說：「屋企又冇雞毛掃，只係得一支捧球棍響度，你估你爸爸會唔會用碌棍嚟打你？」

「梗係唔會啦，捧球棍會打死人架喎！」

「咁其實你明唔明我講乜嘢？」

我有時覺得，有好多嘢，其實係好簡單既邏輯。八九年既時候，我睇過一些電視既畫面，你可能話，我先至係死蠢，因為果啲電視畫面都係假既，係外國勢力「虛構」出來的。近年所聽過既一啲刻意標榜所謂「中立」、「理性」(理性呢個詞語，唉，我查實覺得已經俾有心人騎劫到越黎越接近眨義…)既立場同睇法，我就係冇辦法聽得入耳。原因係，佢地當中既邏輯，總係「聽落」好似有點道理，但稍為用心一諗，佢地既邏輯總係會徹底違背我所認知既「常理」。

我唔知我既仔女，當長大到十來歲既時候，佢會響學校接收到啲點樣既「知識」。佢地要培養出足夠既分析能力，按邏輯同常理去判斷，所收到既知識到底孰真孰假，其實先至係最讓人擔心既一環。

至於我嘛，可能都係有點死蠢，對於那些所謂「中立理性」既講法，至今，還是未能接受。